Exo 19 | NdeIBE | STEP | Ngosuku olufanayo, emva kwezinyanga ezintathu abantu bako-Israyeli besuke eGibhithe bafika eNkangala yeSinayi.

Exodus 19

Entabeni iSinayi

1 Ngosuku olufanayo, emva kwezinyanga ezintathu abantu bako-Israyeli besuke eGibhithe bafika eNkangala yeSinayi.

2 Sebesukile eRefidimi bangena eNkangala yeSinayi bamisa amathente abo phansi kwentaba. 3 Lapho-ke uMosi wakhuphukela kuNkulunkulu entabeni. UJehova esentabeni wabiza uMosi wathi kuye, “Tshela abantu bendlu kaJakhobe labantu bako-Israyeli, uthi

4 ‘Lina ngokwenu lizibonele engikwenze eGibhithe lokuthi ngilithwele ngamaphiko engqungqulu ngaliletha lapha kimi. 5 Ngakho-ke lingangilalela ligcine isivumelwano sami lani lizakuba ligugu kimi phakathi kwezizwe zonke. Lokuba umhlaba wonke ungowami, 6 lina kimi lizakuba ngumbuso wabaphristi, lesizwe esingcwele.’ Yiwo amazwi okumele uwakhulume kwabako-Israyeli.”

7 UMosi wabuyela ebantwini, wafika wabuthanisa abakhokheli babantu wabatshela okwakutshiwo nguJehova. 8 Bonke bavuma ngalizwi linye bathi, “Sizakwenza konke uJehova athe sikwenze.” UMosi wambikela uJehova okwakukhulunywe ngabantu.

9 UJehova wasesithi kuMosi, “Ngizakuza kini nginjengeyezi elimnyama ukuze abantu bangizwe ngikhuluma lawe. Ngakho ngezikhathi zonke bazakholwa kuwe.” UMosi watshela uJehova okwakutshiwo ngabantu. 10 Ngakho uJehova, wathi kuMosi, “Buyela ebantwini ubangcwelise lamhla lakusasa. Batshele bagezise izigqoko zabo 11 kuthi ngelanga lesithathu libe selilungisele ngoba ngalelolanga uJehova uzakwehlela entabeni yeSinayi abantu bonke bekhangele. 12 Yenzela abantu imingcele malungana lentaba, ubatshele uthi, ‘Limukani! Lingakhweli entabeni, kumbe ukufika phansi kwayo. Lowo ozasondela entabeni uzabulawa.

13 Ngempela uzatshaywa ngamatshe kumbe acitshwe ngemitshoko kodwa angathintwa ngesandla. Akukhathalekile ukuthi ngumuntu loba yinyamazana akusoze kuvunyelwe ukuphila. Bazakhwela entabeni kuphela nxa uphondo lwenqama selukhala isikhathi eside.”

14 Ngemva kokubana uMosi esehlile entabeni waya ebantwini wabangcwelisa basebegezisa lezigqoko zabo. 15 Wathi ebantwini, “Lungiselelani ilanga lesithathu. Zilani omkenu.”

16 Ekuseni ngelanga lesithathu kwaba lomdumo lombane othuthumelisayo, leyezi elikhulukazi lehlela phezu kwentaba, kwezwakala lomsindo omkhulu wethilongo. Abantu bonke ezihonqweni besaba baqhaqhazela.

17 UMosi wasebakhokhela ebasusa emathenteni ebasa kuNkulunkulu. Bafika bema ngaphansi kwentaba. 18 Intaba yonke iSinayi yembeswa yintuthu ngoba uJehova wayehlele phezu kwayo ngesimo somlilo. Intuthu yathunquza ngamandla kungathi iphuma emphongolweni.

19 Njalo umsindo wethilongo waya ulokhu ukhula. UMosi wakhuluma, kwathi ilizwi likaNkulunkulu lamphendula. 20 UJehova wehlela phezu kwentaba iSinayi, wabizela uMosi khona. Ngakho uMosi wakhwela,

21 uJehova wasesithi kuye, “Buyela phansi uyexwayisa abantu ukuba bangaqali ukweqa imingcele ukuba babone uJehova ngoba bangafa ngobunengi. 22 Labaphristi abaya kuJehova kumele bazenze babe ngcwele, funa uJehova ababhubhise.” 23 UMosi wathi kuJehova, “Akulamuntu ongakhwela entabeni yeSinayi ngoba wena ngokwakho wathi bangakwenzi lokho. Uthe ngenze imingcele egombolozela intaba ngitshele abantu bangasondeli kuyo ngoba ingcwele.”

24 Kodwa uJehova wathi, “Yehla uyebuya lo-Aroni. Kodwa abaphristi labantu akumelanga ukuba beqe imingcele besiza lapho ngoba ngingabaphendukela.”

25 Ngalokho uMosi wehla waya ebantwini wabatshela.